嚟緊星期日係一年一度嘅渣打馬拉松，跑手又點會少得selfie呢？香港中文大學校長沈祖堯噚日就拍咗條短片，話佢今年會參加10公里賽事，同大家一齊撐到底，仲約實大家喺終點維多利亞公園嘅中大攤位同跑手selfie，想同祖堯BB合照呃like嘅跑手就千祈唔好錯過啦。祖堯BB話中大馬拉松隊有超過3,100位跑手參加渣打馬拉松，打破歷年紀錄，又話有逾450位中大師生啦啦隊為各跑手打氣。祖堯BB早前公佈用咗10個月減咗32磅、腰圍減咗4吋，相信佢跑完呢場馬拉松，隨時再fit啲。