拜仁慕尼黑喺周二德盃16強主場1:0小勝禾夫斯堡，隊長拿姆賽後宣佈會喺今季結束之後掛靴。佢退役之後想暫時遠離足球事，婉拒咗球會升佢上神枱做體育總監，或者想喺商界大展拳腳。
現年33歲嘅拿姆，基本上算係一生一會嘅球員，曾經借過去史特加兩季，其餘職業生涯都係喺拜仁度過，無論踢左右閘以至防守中場都咁掂，至今已經贏過八次德甲、一次歐聯以及一次世界盃冠軍。佢話已經婉拒咗出任拜仁管理層，希望掛靴後放一個悠長假期。其實拿姆早已為掛靴後鋪定路，早年曾經入股過國內體育用品公司，仲有做吓各式各樣投資，唔踢波都仲有大把世界。
拜仁又再累街坊
對於拿姆嘅足球生涯成就，相信幾乎全部拜仁球迷都讚許，但歇冬後支持拜仁嘅賭仔就唔多歡喜。周二盃賽又僅熟，歇冬後四場比賽未試過贏多過一球，四場波「讓球主客和」全開拜仁[-2]，結果全部開對家。
