NFL新英倫愛國者喺周日第51屆超級碗上演驚天逆轉，加時以34:28反勝亞特蘭大獵鷹，球隊喺周二就返到波士頓舉行勝利巡遊，主場粉絲就梗係要歡迎呢班奪冠英雄凱旋啦，數以百萬計市民齊齊冒雪上街。
榮膺MVP嘅四分衞布拉迪已經係第五次高舉超級碗，佢仲帶埋囝囝班哲文一齊巡遊，佢仲好激動咁同班粉絲講：「我應承過大家會帶呢個獎盃返屋企，我哋做到喇！呢場比賽真係好難打，我哋呢世都會好好記住呢一刻！」雖然布拉迪嘅超模老婆Gisele喺超級碗之後就嗌佢退役，但呢位39歲老將就話：「如果由我老婆話事，佢會嗌我即刻退役，但我仲想打到45歲！」
