早排有報道話中央政治局常委張德江南下為奶媽林鄭月娥箍票，其中一個目標係香港一眾大孖沙，而冇派任何長和系代表去奶媽造勢會、外界盛傳支持薯片曾俊華嘅長和主席李嘉誠動向，自然受政商界關注。
點知噚日網媒熱血時報就影到超人同兩個仔、長和副主席李澤鉅及電盈主席李澤楷，去咗中聯辦同官員會面。據熱血時報報道，李氏三父子喺噚日下午3點半左右到中聯辦，逗留約40分鐘後離開。片中顯示，中聯辦主任張曉明、副主任黃蘭發等人，均在門外送行，而各人均面露笑容。
超人父子係呢個咁敏感時刻現身西環，自然引起坊間好多猜測，而長和系發言人喺截稿前，未有回應事件。
敏感時刻現身惹猜測
不過有消息人士話，超人三父子噚日到訪中聯辦，係農曆新年期間嘅拜年活動，而中聯辦話由新華社香港分社年代已開始，每年農曆新年都會互相拜年問候，仲話「李先生挺高興，大家過好年」，今次拜年早於假期前已約好時間，但未有透露超人同西環拜年時談論嘅內容。
有政界中人笑言，超人去西環拜年時間得佢同西環知，咁多年都冇人影到，咁啱今年咁敏感日子就俾人影晒，當中有乜原因，肯定有排估。