已經退休、不時論政嘅前問責高官孫明揚，噚日喺佢嘅報紙專欄話，以前曾俊華人氣未係咁高嗰陣，由於自己同佢一樣都係頭髮白白、戴眼鏡、有撇鬚，有次佢同老婆去街市買餸時，就俾人認錯佢係曾俊華：「（市民）熱情地拉着我，稱讚『我』做得好好，要繼續努力。」
官場老手孫公撰文時又指，曾俊華現時人氣越來越高，喺香港幾乎無人不識，但係佢就認為，中央希望有個熟悉處理政改嘅人當特首，了解中央嘅想法，亦知道上次功敗垂成嘅癥結，總好過一個不知道當中關鍵嘅人，要從頭走一次艱苦嘅舊路。
孫公話林鄭有深入處理嘅經驗，但係曾俊華冇，「我認為，林鄭月娥與曾俊華的高下分野主要在此處，並非中央信任與否，亦非能力問題。」