大家原本有機會喺全英羽毛球賽睇到中國球手林丹同馬來西亞球手李宗偉嘅夢幻對決，可惜家陣好夢成空喇。因為現年34歲嘅大馬名將李宗偉，日前喺訓練嗰陣整傷膝頭哥，預計要休息三至六個星期，換言之，佢將會缺席下月7日至12日喺英國伯明翰舉行嘅全英羽毛球賽。李宗偉個教練葉誠萬就話：「李宗偉去到呢個年紀，傷病無疑係佢最大嘅挑戰，我哋都希望佢可以盡快好番。」