由多個民間團體組成嘅公民聯合行動即日展開「2017特首選舉民間全民投票」，就算喺小圈子冇票嘅市民，都可以透過手機程式或網上平台投票，提名想支持嘅候選人，雖然冇約束力，但當表下態消消氣又無妨，但原來系統惹來嚴重嘅保安漏洞疑雲。
「前線科技人員」專頁喺facebook呼籲「暫時不要參與PopVote投票」，話有關系統需要取得投票者嘅Telegram戶口密碼，令相關人士可讀取投票者喺Telegram嘅所有訊息：「我們認為這是很嚴重的保安漏洞，在我們取得進一步的澄清之前，我們呼籲各位市民暫時不要參與投票。」
專頁呼籲已投票人士喺Telegram「clear sessions」，有從事網絡保安人員解釋，即係提醒投票人士log out所有設備，例如手機、電腦嘅Telegram，以策安全。
教協總幹事馮家強亦話，若投票人冇裝Telegram，PopVote網站都會自行幫佢註冊。公民聯合行動其後發聲明，強調收集資料不會外傳。