類似大台姐仔爭寵嘅花邊新聞，竟然連英超班霸曼城都會出現，「耶穌仔」加比爾捷西斯呢期真係紅，連續兩場正選上陣，就幫曼城攻入三球全取六分，成為「藍月」新寵兒，亦搞到首席射手阿古路（小圖）連續兩場坐後備，引起離隊傳聞，據報皇家馬德里同巴黎聖日耳門都準備買佢，不過曼城領隊哥迪奧拿就做好兩手準備，如果阿古路走人，就會買多蒙特前鋒奧巴美揚。
哥帥周一朝早就放球員假，下午先復操，不過睇阿古路同耶穌仔有講有笑，又唔似不和。耶穌仔周一朝就到距離住緊嘅酒店約500米嘅髮型屋恤靚髮，點知恤完就落大雨，佢唔想整濕個頭就即刻call Uber，冇幾耐就有架靚房車接呢位球星返酒店喇。