新英倫愛國者星期日喺NFL超級碗大逆轉，一度落後3:28之下，終於喺加時以34:28反勝亞特蘭大獵鷹，搞到加拿大靚女網球手寶查要「找數」，同粉絲約會。
諗住獵鷹贏硬下巴輕輕
22歲嘅寶查雖然近年網球事業發展平平，但勝在樣靚身材正，又唔介意喺網度開心些牙自己嘅靚相，所以粉絲人數高企，當中男性梗係特別多啦。喺星期日超級碗比賽期間，寶查BB喺獵鷹成功第四次達陣之後，就喺佢個有過百萬追隨者嘅twitter度話亞特蘭大贏硬。見到偶像咁講，有一位粉絲就膽粗粗搭嗲，問如果愛國者贏咗，佢哋可唔可以約會。寶查見獵鷹個勢咁好就應承咗，點知之後睇住布拉迪帶領愛國者造出超級碗歷來最大逆轉，第五次捧走超級碗。
賽後，寶查BB喺twitter度話自己上咗一課，仲話以後都唔會落注同布拉迪作對喎；佢亦都牙齒當金使，問個粉絲住喺邊，似乎已經準備好「找數」。原來呢位幸運兒係一名小粉絲，佢話自己住喺芝加哥，喺密蘇里返學，仲話：「你想同我去邊度約會都得㗎！
10.8億創超級碗投注新高
不過，呢位粉絲要夢想成真，可能仲要問過冰球手卡朗先得。寶查BB早喺2015年就已傳出同卡朗拍拖，佢哋一直冇承認。近日寶查上載自己曬太陽嘅相嗰陣，其中有一張就有一條強壯嘅男士手臂摸住佢大髀，而有人從手臂嘅紋身，就估係卡朗喎。
講番新英倫愛國者，佢哋已經喺星期一下晝返到波士頓，抵埗時仲獲得有關方面射水炮歡迎；而喺星期二就會進行勝利巡遊，相信包括布拉迪在內嘅一班主力都未可以真正唞得住。
另外，據報愛國者鬥獵鷹嘅呢場波，破咗拉斯維加斯歷來嘅超級碗投注紀錄，錄得1.38億美元（約10.8億港元）嘅投注額；不過，博彩公司威廉希爾就話自己喺呢場波蝕咗六位數字，因為喺愛國者落後期間，唔少人貪好分，走地買愛國者反勝喎！