農曆年快過，小朋友及單身男女應該開始「盤點」大行動，好似Boxing Day拆禮物咁拆利是，其實利是係親友嘅祝福，金額並唔重要，但八方最近就見到一封值千金嘅利是噃。
事緣八方喺facebook睇到大作家倪匡伉儷，同倪生契女、豐林文化傳播嘅施陳麗珠（珠姐）合照，珠姐手持兩封利是就係倪生伉儷畀嘅。封利是最特別係倪生親筆寫上祝福語「健康快樂」，幾個字剛健有勁，相中倪生個樣亦好精神。
嘩，倪匡作品家喻戶曉，銷量長勝，近年更甚少提筆，所以封利是真係「一字千金」。不過，珠姐講笑話，「我覺得契媽嘅簽名比契爺嘅更珍貴！」咁又係，倪太好低調，要佢嘅墨寶更難。
拍片大讚契孫新作
倪匡同八方講過收珠姐做契女，係因為珠姐好照顧佢哋，大家好有緣份。其實倪匡都好錫契女，仲有契孫。
最近拍片大讚筆名「百無禁忌」嘅契孫新作《螺旋路》，「寫人同蚊嘅關係，好有趣」。倪先生從來有嗰句講嗰句，要得到佢讚賞，一啲都唔容易，對新作家嚟講，一定比收利是更高興。