特首提名期咁啱喺情人節開始，唔知邊位參選人、情人節嘅節目係擔凳仔搶閘報名，向忠實粉絲送大禮？但肯定提名期倒數前，係佢哋約見選委拉票嘅熱門檔期，好似星期四咁，經民聯特別整咗兩場參選人見面活動，兩點見曾俊華，3點輪到葉劉，兩人都各自有一個鐘頭時間sell下自己，好似好公平，但查實林鄭已經喺1月底，獲邀同經民聯見面咯，而經民聯監委會主席林建岳亦擔任林鄭競選團資深顧問噃。唔知曾俊華同葉劉兩位，可唔可以後來居上？
有17票嘅中華出入口商會，將喺星期四搞參選人座談會，一日見齊4個參選人，認真一視同仁，唔似其他界別，當胡官冇到。據知當日由葉劉打頭陣，中午前有林鄭；午飯後有胡官，曾俊華則壓軸，接見嘅排名先後，應該冇乜玄機啩？