【公司專訪】
「百足咁多爪」的759阿信屋（母企為CEC國際，759）開業七年，最新業績半年蝕近3,000萬元，老闆林偉駿接受本報專訪時，否認表現不佳的主因是自己「太多心」，形容只是當時錯估形勢，「行得快咗、開頭太順利。」預告短期內關5至6間專賣藥妝的759 Kawaii Land。
記者：范穎琛
年近60歲的林偉駿在商場打滾半生，面對業績倒退及網民批評，仍充滿「阿信精神」：「依個世界有批評好過冇批評囉，如果講都冇人講你就玩完啦！仲有人鬧吓你，唔係阿Q呀，因為我哋做緊生意，又唔係完全向下滑，只係之前爆得太快，現時持平，好多公司都出現咗，我哋做六年先出現，算遲㗎啦。」
僅配送未完善
本港零售業銷貨額已連續跌超過20個月，林偉駿認為阿信屋過去三年發展太快：「應該係2015年經濟開始滑滑哋，但我哋仲諗住借勢上去，變咗開多咗分店。」
截至去年10月底止，集團共有255間分店，業務覆蓋零食屋、雲吞麵、急凍食品超市、家電舖等，定位不清晰。但林偉駿不認為集團須集中火力發展其中一瓣：「其實瓣瓣都咁做，好多人話我哋亂晒龍，其實我哋係開舖做買賣、乜都賣，我唔覺得我哋係多心，我哋一路去賣多啲嘢問題唔大，（問題）只係配送方面未完善，我哋就夾硬去。」
部份Kawaii Land擬關店
他指未來部份店舖租約期滿，或會關店，短期內料會關5至6間專賣藥妝的759 Kawaii Land。
林偉駿認為，零售近年確有下調趨勢，但不認同現處於行業調整期：「我做咗咁多年，每三幾年都有一個波浪㗎啦，我唔敢講今次係零售調整，但做生意嚟講起起落落係必然嘅，只不過我哋部份投資未完全得到回報。」他認為，內外經濟環境轉差是令業績倒退原因之一。
他相信，集團目前貨源仍未足夠支撐顧客所需：「啲客真係想揀選多啲嘢㗎，要乜都有啲，例如我哋電飯煲冇咗，有人會打嚟鬧，所以我唔做唔得㗎！」
他又補充，集團平日平均銷售5,000種貨種，假日則達7,000至9,000種，證明客人「真係想揀多啲」，因此必須引入更多貨源，例如雞粉、油、面膜等，實行「要乜有乜」。
