【爆相爆片】文詠珊（Janice Man）過去兩年努力開拓內地市場搵人仔，劇集一套接一套，上個月啱啱拍完《失憶之城》返香港，以為可以同好耐冇見嘅愛犬見面，點知愛犬喺佢返嚟一日忽然病逝，令JM超級傷心。
不過，人總要向前行，隨着農曆新年過去，JM亦已收拾心情，前日仲開心孖男友吳啟楠（Carl）去街市買餸，實行返屋企玩煮飯仔。讀者陳小姐透過本報「爆相爆片」，分享咗佢前日黃昏6點左右，喺街市見到JM同男友拍住拖去買餸嘅片。陳小姐話：「我喺炮台山水星街街市見到佢哋，主要買肉同菜。」
男友負責拎
陳小姐又話，相信JM應該識煮飯，因為見佢去到街市都已經諗好晒買乜嘢。問JM男友有冇幫佢手？陳小姐話：「主要都係JM揀，兩個人有傾有講，好似都商量吓點整咁，買完就見佢男友都好有風度咁幫JM拎住啲餸，然後就一齊坐一架七人車走喇！」馮仁昭噚日打電話搵過JM，佢笑住話：「咁都俾人影到？我嗰日啱啱喺嗰度附近，好少返嚟香港，咪煮飯食囉！煮埋畀媽咪食㗎！」
