恒隆地產（101）太子爺陳文博，自從舊年做咗執董之後，越嚟越多曝光。好似前日佢特登去咗恒隆義工嘉許禮，表揚一批同事舊年夾埋做咗1.4萬個鐘頭義工活動。點知佢上台嗰陣，面對住一批熱心同事，尷尬嘅事情就出現喇。「必須承認，我舊年冇參加過義工」，佢好鬼唔好意思咁話因為好忙，冇時間去做，嚟緊一年會做番多啲。不過，陳文博以前都試過同基層嘅小朋友畫畫，仲好有耐性教佢哋。其實恒隆呢個義工團，2012年成立之後，都搞過大大小小、唔同類型嘅活動，一眾高層都有份參加。咁主席陳啟宗呢？梗係負責捐錢only啦。