雞年開始無耐，立法會已經開始有場拉布戰，財委會本周五（10日）會處理新一屆問責官員加薪12%嘅撥款申請，周六（11日）仲會加開4節會議處理，朝9晚7大作戰，主席陳健波話明會劃線限制議員每次3分鐘發言時間，民主派則話明會拉布迎戰。
據了解，至今已經有6位民主派議員，據《議事規則》第37A條提出225項臨時動議修正案，提出最多嘅係自決派劉小麗同香港眾志羅冠聰，各自達91項同89項修正案。人力陳志全就提30項，資訊科技界莫乃光亦有12項，民主黨就由尹兆堅及鄺俊宇，各自提兩項及一項，預料波哥最終會整合至廿零卅項，而佢噚日同傳媒團拜預告周六剪布，希望當日表決有關撥款，唔想再拖，以免影響之後嘅撥款項目。
政府指2016年丙類消費物價指數嘅實際數字已於上月23日公佈，故調整政治委任官員薪酬增幅由原先的12.4%調至12%。