換屆選馬仔關我乜事？
大家來問林鄭換咗眼鏡框有什麼寓意？葉劉一身粉紅色有否問過麥玲玲？胡官不如戴個麥兜媽同款假髮？鬍鬚曾索性剃咗兩撇蝦餃？
今時今日指出某某衣着、妝容、打扮失常、胡鬧、不合格比較困難。政客與明星大可禮聘專人料理，況且人人都是自己的設計師，時尚洗禮那麼多年，若然失手都是故意、想引來衣不驚人死不休的關注！
其實着衫着得好不好與官場順不順利無太大關係，如果有；陳方安生特首咗好耐囉！
話之佢哋去變性，上頭鐵定係佢做，變咗鵝公喉，一樣入住禮賓府。
邊個做，結果點會有大分別？
董生做，大家罵不留手；曾生做，大家罵仍未爆；梁生做，大家罵到爆炸……有後生仔在面書新春鋪文:
「恭喜梁振英快啲仆街死、恭喜恭喜！」類同潑婦罵街點只一則？更惡毒、更陰騭、更無聊的謾罵鋪天蓋地，大家鬧慣咗，人人鬧、你點可以不鬧？羊群效應，出位加兩錢肉緊，最終不外乎無聊！
罵得情切又如何？
以下情況定必出現：
一、肯定佢最近不會仆街死。
二、肯定佢會俾你鬧到離任。
三、肯定佢會表面滿口真誠！
鬧人鬧得咁仆街？
福有攸歸，即係鬧返自己。
後生細仔當眾鬧人仆街，除了冇品一無是處！
絕對改變不了任何事實、政治現實！
議會廢青小學雞幼稚行為不獲普遍支持，全因讀書讀到滿腦廁紙，對特區政府再反感，對特首有多厭惡，我們都不容小覷類同舉動將香港形象拖垮。有才智、有膽識，需以理性行動配合，而非行為白癡。