日防夜防，家賊難防，曼聯嘅卡靈頓訓練基地唔通養咗個賊？菲爾鍾斯上年聖誕諗住送對鑽石耳環畀未婚妻，就放住喺自己個儲物櫃入面先，點知對耳環不翼而飛！家陣警方仲查緊，不過好似未有頭緒。
準備聖誕節冧未婚妻
呢排卡靈頓訓練基地間中有警察出入，英國《太陽報》就查到，原來曼市警方查緊一單盜竊案。據報，曼聯中堅菲爾鍾斯上年訂造咗對鑽石耳環，諗住聖誕嗰陣送畀未婚妻Kaya Hall。我求大俠估可能鍾斯想玩surprise，又擔心放喺屋企被未婚妻發現，所以就將對鑽石耳環放喺自己個儲物櫃度。
不過，鍾斯之後發現對耳環唔見咗！報道冇透露對耳環價值幾錢，但鑲得鑽石，應該唔平。訓練基地嘅更衣室唔單止球員同教練入得，卡靈頓所有職員都可以去到，所以警方有排查喇。《太陽報》引述消息人士話：「警察上星期嚟到，同幾個工人問話，佢哋仲拎走咗啲閉路電視同埋電腦紀錄去查。」
普巴數口精壓價買樓
呢邊菲爾鍾斯破財，另一邊中場保羅普巴就數口精，狂壓業主價買樓。普巴加盟曼聯後，一直都住喺酒店，但最近終於買到屋。呢間屋交通算方便，離卡靈頓訓練中心都係20分鐘車程，入面有五間睡房，普巴招呼晒啲兄弟嚟都夠住；間屋仲有室內暖水泳池同埋桑拿房㖭！業主見普巴咁高人工就開價大約350萬鎊（約3,400萬港元），但普巴原來數口好精，係咁壓價，最後以290萬鎊成交，平咗近兩成，即係60萬鎊。當普遍香港人做十幾廿年嘢都未買得起層樓，周薪29萬鎊嘅普巴用10個星期嘅人工就已經買得起一間豪宅。
另外，呢排曼聯同基沙文啲「緋聞」真係日日新鮮，呢位馬體會前鋒嘅形象顧問話，如果基沙文加盟紅魔，可以增加自己嘅商業價值，係一筆「錢」途無限嘅轉會。此外，前日係慕尼黑空難59周年，曼聯喺奧脫福外舉行咗簡單嘅悼念儀式。