各路特首參選人，磨拳擦掌爭入閘，而佢哋有冇一個好嘅班底，非常重要，好似教育局咁吖，若然再話由吳得掂揸fit做局長，相信冇乜選委肯畀提名咯！中大校長沈祖堯一直都被視為搶手貨，如果佢肯加入成為班子成員，參選人定會如虎添翼。祖堯BB噚日同傳媒團拜時自爆，真係有特首參選人向佢打主意，之不過佢冇應承，因為想喺2018年完成中大校長任期後，加入醫學院繼續醫療及教學工作。
中文大學噚日舉行傳媒新春團拜，跑馬仔成為熱話，祖堯BB作為盛傳中嘅司局長人選，當然會成為焦點。祖堯BB承認有參選人搵過佢，但佢冇say yes，唔知因為熱廚房太熱，抑或怕順得哥情失嫂意？
八方同事苦苦追問，佢唔肯透露邊位參選人慧眼識英雄，以及邀請佢做乜嘢崗位噃，固之然都唔會開腔，話明支持邊位做特首啦！佢強調自己政治中立，唔會接受任何政治任命喎。
讚馬斐森好校長
講到港大校長馬斐森提前離任，祖堯BB話對方是一個好校長，認為港大「損失咗啲嘢」，但唔會評論馬斐森嘅決定，佢話全球政治環境都好複雜，唔只香港，作為大學校長，希望維持大學嘅學術地位。
負責新任校長遴選小組嘅副校長霍泰輝則指，小組於去年10月已啟動全球招聘機制，正處於搜尋人選階段，預計6月放暑假前完成初步程序，佢話人選雖然暫未有消息，但因為中大具吸引力，能夠吸引優秀人才，所以唔擔心下年多間大學校長合約完結，會影響招聘情況，表明會同學生定期溝通，盡快通知招聘新校長情況。
至於做過特首辦主任同食衞局副局長嘅港大醫學院院長梁卓偉，噚日同傳媒新春聚會，梗係被追問有無特首參選人邀請他站台、發表意見、加入競選團隊甚至加入成為下一屆班子？佢就話，曾俊華、林鄭同葉劉佢都相識，但因有大學公職在身，必須中立，唔適合站台，仲話婉拒咗唔止一方，咁即係有被邀請啦。他又話，希望特首選舉係公平公正，希望有理性、深入嘅政策辯論，令香港人有真正選擇。
李八方