雞年頭炮八方相當年，主角同今年生肖雞仔無關，反而係一隻馬仔，就係已經宣佈參選特首戰，積極爭入閘跑馬仔嘅退休法官胡國興嘞！點解明明退咗休，咁逍遙快活，都要咁辛苦見選委去拉票呢？胡官話呀，一切係由廟街開始。係呀，大家冇聽錯，係有平民夜總會嘅廟街呀！
負笈英倫 chok住影相
71歲嘅胡官喺宣佈參選當日話呀，其中一個出戰特首賽嘅主要原因，係不滿現任特首梁振英治下幾年，社會撕裂，而佢由做大律師到法官，到𠵱家選特首，希望令香港重回正軌，行正道，原來要由廟街講起。有成十兄弟妹嘅胡官憶述，年少時家住佐敦，細個時成日夜晚去廟街嘅平民夜總會流連，當時買吓零嘴、睇吓賣武同雜耍，已經好開心嘞。
而嗰陣佢都不時見到個着唐裝嘅男人，向小販檔主收錢，自言當時雖然年紀小，但都仲知道佢喺度收保護費，事實上佢亦見到小販一臉心不甘情不願。由嗰時開始，佢就立志要做大律師，為香港建立一個公義兼有人情味嘅社會喎。
胡官英華書院預科畢業後，去咗英國伯明翰大學修讀法律，佢向八方提供咗一張身穿畢業袍嘅相，係1968年佢喺伯明翰大學法學士畢業禮上拍嘅；着上燕尾服，西裝筆挺嗰張呢，係翌年佢喺葛雷士法律學院嘅大律師畢業禮時影。睇番當年今日，一樣都係面圓圓，但當年就戴黑框眼鏡好有書卷味。
但八方至like嘅，反而係佢1966年喺倫敦海德公園影嘅相，除咗眼鏡嘅佢，着住西裝chok扮甫士，嗰個迷人嘅眼神，當年可能冧死唔少女同學噃。
李八方
