雖則係梁粉，但咪以為樣樣硬撐，好似民建聯立法會議員周浩鼎咁，最近就公然表明唔撐CY開發郊野公園起屋嘅建議喎！
周浩鼎話唔算行山發燒友，但偶爾都去遊一遊，最近去咗馬鞍山郊野公園，邊行山邊拍片講吓郊遊有幾咁好，係一家大細嘅活動好去處。不時同外國人接觸嘅佢特別提到，唔少外國人好鍾意行山，外國網站仲特別向旅客推介嚟香港行山旅行，其實都算好有經濟效益，覺得如果將郊野公園攞嚟起屋就唔係咁好。如果低生態價值嘅郊野公園用地又郁唔郁得？佢話始終唔多好，因為都係破壞環境，公開力勸梁班子要對此建議「三思」。
但佢重申，唔係反對梁振英覓地建屋嘅建議，只係覺得唔應該打郊野公園嘅主意。