乜選特首真係咁好玩？日日都要做騷冧市民，唔辛苦㗎？但有人要爭入閘喎！好似70歲嘅余永賢（圖）咁吖，佢係香港科技協進會前副會長，上屆2012年唐唐大戰CY加埋何俊仁入閘陪跑之時，佢都宣佈過參選，但最終當然係攞唔到足夠選委提名「入閘」啦！
話有選委支持
但佢嘅意志力驚人，噚日召開記者會（喺四季酒店開㗎，好高級）宣佈參選特首，主打「科教興港」，話要帶領香港邁向知識型社會，而且都有預備政綱，包括訂立法定標準工時、推行全民退保、重啟政改、取消TSA同重點推行國民教育，算係做咗功課！
佢自稱優勢在於不屬建制內，冇包袱，亦有國際經驗，深信可以為港人帶來新願景，相信「有心不怕遲」，已開始力爭選委支持，仲話有選委話撐佢，但不便透露呢位扒大冷嘅選委身份喎。