事頭婆英女皇伊利沙伯二世本月6日登基65周年，成為史上首位慶祝登基65周年藍寶石禧嘅英國君主，英國官方限量發行一系列紀念幣慶祝，由英國皇家鑄幣局鑄造，香港都獲限量配額。
慶祝65年「藍寶石禧」
紀念幣分兩組設計，經白金漢宮御准 ；一組重量級由聖公會主教Gregory Cameron操刀，唔只將英國皇家徽章重新演繹，仲加埋象徵英女皇性格特質嘅植物裝飾。另一組標準級由鑄幣局設計師Glyn Davie創作，用另一角度呈現英女皇加冕典禮出現嘅帝國皇冠，刻意用皇冠後方嘅著名史都華藍寶石（Stuart Sapphire），凸顯藍寶石禧；皇冠旁邊仲鑄有女皇在21歲生日外訪嗰陣演講辭節錄名言，幣邊更刻有女皇加冕講辭金句「Shine through the ages」（彪炳千古）字樣。每款幣面都鑄有「Sapphire Jubilee」（藍寶石禧）及女皇登基至今年份刻字：1952-2017。
重量級及標準級共8款規格，當中7款為限量嘅精裝金銀幣，售價由938港元起；另一款為「普鑄幣」採用銅鎳合金鑄造，只售198元。查詢電話︰2845 8330。