薯片叔叔噚日公佈政綱，但唔少「奶粉」已經叠埋心水，不論薯片政綱如何，都會提名畀「奶媽」林鄭月娥，好似中總18票，過年前已經講好咗會綑綁畀林鄭。之不過呢，就算有心水人選，The Show Must Go On，中總明天舉行嘅新春酒會，唔單止請咗「奶媽」，會長蔡冠深透露請齊4個特首參選人，兼且通通應承出席，可能係選戰開打以來首次4人同場亮相。
講返中總，今年都有連串活動舉行，除咗一貫會舉行嘅經濟論壇，又會搞個創新創科創業大賽、一帶一路文化節等等，蔡冠深粗略估計各項活動加加埋埋，開支要2,000至3,000萬，𠵱家仲要籌多大約1,000萬。
蔡冠深話過年時去咗越南，皆因博鱉亞洲論壇想喺越南胡志明市舉行，搵中總幫手合辦，所以新年時就去胡志明市商討有關事宜。