莊曾眾籌一開波，timing無得彈，在鄭蛾甩鞋分享會當日開波，一吹雞，財源滾滾立馬癱瘓網站，師奶阿嬸平日堅離地的，都霍然心動，叫仔女幫手上網捐錢，幫二撇雞打了支強心針，心安理得。點解莊曾眾籌大小通吃吸金能力這麼強？
一，選委小圈子外人無得玩，市民㩒掣捐出些少，快感足以讓捐款人覺得自己有得參一腿，個party有份玩，有份high。過去二十年，從無試過。
二，鄭蛾分享會列陣者，地產商和地產商富二代排頭位，乍看儼如唐唐2012造勢會復活！想做唐唐又拜西環又摟鄉紳又天堂留位，邊有咁着數先！唔抵得2.0自以為已經攻陷票倉考硬第一的市民，唔使講粗口，斯文地，㩒掣，well done。
三，張小明大師鬼畫符四個字就賣得千六萬，莊曾擺明方向，絕不一路向西，眾籌靠揼石仔小額捐款，夠貼地，每一筆捐款，等同對西環舉中指說不！叫朋友一齊㩒掣，獻金代磚，圍堵西環！人數萬萬聲，警方點抽水篤數？胡椒都無碇噴！