周三（8日）晚快活谷跑八場夜賽，其中第7場三班1650米賽事，見到雷神莫雷拉對大摩隻「勝利歡星」特別喜愛有加，因為佢已經連續幫呢匹馬快跳多次，大摩副練亦經常為此駒踱步，可見重視。
睇嚟唔單止雷神鍾意，呢匹「勝利歡星」今仗亦備受摩廐中人緊張。試問今期夜賽，點可以忽視呢匹馬呢？
4歲嘅「勝利歡星」同父現役馬有「澳斯卡」在港5勝，相信呢個種嘅子嗣都係較早熟。「勝利歡星」來港4戰最叻跑第四，只因右前腿外側小掌骨曾骨裂，影響進度，不過今次突然獲雷神垂青肯騎，明顯反映此駒狀態已到位。
事實上，「勝利歡星」今次隔咗個幾月先再出，期間無缺過課，仲不斷搵廐侶拍跳，如此秘密練兵，無非想收埋操磨利先跑。「勝利歡星」外地一戰即勝，來港後亦近乎未用過，仍有大把里程待用，今戰好大機會嚟個華麗變身。