林鄭月娥初七造勢會劣評，證明她已陷入Murphy's Law，即凡可以錯的都會出錯。
由徐子淇御用化妝師化的靚女妝，到藍撞桃紅衣着，Backdrop設計到口號We Connect都出事，網民發現we connect原來是加拿大手機遙控成人情趣用品的apps，大家立即聯想到connect西環或北京遙控下的「高潮」……林鄭參選至今，連累了知名建築師嚴迅奇、設計師趙廣超，今次仲擺埋設計界大佬輩劉小康上枱，佢真係掂邊個衰邊個。無他，公眾對她的觀感已變壞，人人搵錯處。這情況同梁振英極其相似！
選戰已進入上半場尾段，下星期提名就係下半場開始，總結上半場可以話林鄭強陣出擊，粒粒皆星控球在腳兼搶攻，但將多於兵，禁區外迂迴推進，戰術老套陳舊。薯片叔打防反，一截到波就快速反擊，輕裝上路，無明星大款，但就以專業、默契、戰術取勝，上半場贏兩球已經少。香港人，一見到譚惠珠、鄭耀棠、梁愛詩、新社聯梁志祥、陳勇、一棚富二代、大量新界幫撐場，這場面就等如梁振英路線灌頂儀式，即使加幾件唐粉如任志剛、林大輝，都唔會沖淡陣味，造勢大會擺明向香港人挑機，網民唔還擊都幾難。此時此刻，薯片來個眾籌行動，自然贏盡民心。
北京拍板換人明顯是為了改善政局、化解矛盾，但在土共及港澳系統官員強力操作下，林鄭被矮化為面目模糊的政治小媳婦，即使當選，其政治能量比梁振英更低，特區政局比現時更難駕馭，咁梁振英就真係無辜犧牲。這也怪不得林鄭，她也是過去五年公公婆婆插手香港事務，做慣手勢下的受害者。過去一大棚古靈精怪極左群眾組織，夠膽動員去機場毆打議員，唔通特首吹雞咩？背後當然係有一個系統在運作，當政治權力不再集中在香港特首手上時，內地一套政治手段引入香港，就係造成社會大撕裂原因。𠵱家意圖換個keeper，搵個形象好少少去頂上，但實際過去五年操弄香港政局的「幕後勢力」，仍然未有改變，甚至為林鄭造王，繼續控制香港政局。而林鄭為了權位，選擇同魔鬼交易，間接協助西環繼續治港、愛字頭繼續橫行，加上她政治出身並非紅色嫡系，如果佢做特首，香港政局只有比梁振英時代更差！
民望高或有蜜月期
薯片叔在小圈子千二人中，個勢比林鄭弱，好大可能贏民望輸選舉，他應該有以敗為勝的覺悟，全面走入群眾，在眾籌之外，落區搞Town hall meeting、擺街站宣傳，變成專業政治人。他在社交媒體完勝，林鄭一開facebook就會中伏，肯定會有大量嬲嬲湧現。如果薯片叔身體力行，用一次真實的election campaign走入社區，團結香港人，示範乜嘢叫做放開矛盾，修補裂痕，也用行動說明中央同香港人冇根本矛盾。如果輸咗，市民會替他不值之餘，他取得的政治信任及群眾支持，或會成為另一股政治力量。如果中央最終接受現實，拍板支持，在小圈子選舉中贏得勝利，高民望會為他帶來一段蜜月期，猶如2005-2008年的曾蔭權，有自主空間，擺脫西環治港，擺脫小媳婦之難堪局面。
添馬男