練馬師徐雨石唔止係低班賽之王，亦係泥地王。這天（5日）佢於沙田日馬僅有的兩場泥地賽，均憑旗下王牌馬勝出，分別為第三場四班1200米蔣嘉琦靠放贏「勇冠多」，以及第九場三班同程1200米，另一華將黎海榮的冷門「藍天堡馬」同樣一放到底，此駒單Win及組合獨贏A2分別派132.5及40元。
六歲馬「藍天堡馬」去年11月初季內首戰，在二班1400米因開閘時以後足豎立，將左前腿伸進隔鄰閘廂，因而沒有參與競逐。競賽小組隨即着令此駒必須至少連續三次試閘及格後，才可再次出賽。
「藍天堡馬」上仗於1月18日復出跑泥地短途，由黎海榮後上第三，表現復好。今次匆出途程及班次照舊，中檔起步順勢埋欄領放，就此贏半馬位，打開今季勝利之門，黎海榮自從11月6日贏完「佳運來」後，守齋三個月，終於走出黑暗期，今季暫時只得五WIN。
今場二至四名分別為「鐵男」、「炸魚薯條」及「仁愛之星」，四重彩派二萬五千幾。而賽事跑到末段，蔣嘉琦座騎「歡樂一生」因前面的「炸魚薯條」向內壓入而失蹄，幾乎導致蔣嘉琦墮馬，她在鞍上失晒平衡左搖右擺，幸好她眼明手快兼手力足夠，雙手捉實韁繩，終於坐定定，成功化險為夷，但「歡樂一生」最終落第只跑第六。