早排走到去上環食晏，發現新開一間「車仔麵專家」，最特別唔係碗麵，而係餐廳外牆，畫咗一幅名人排隊買麵嘅巨型畫，一睇就知係本港著名漫畫家甘小文嘅作品。
甘小文話，上環呢間「車仔麵專家」上月開業，老闆Jimmy搵佢幫手製作一幅外牆畫作招徠，原先只係玩懷舊、本土概念，畫個老式麵檔，加埋佢嘅招牌漫畫角色哨牙珍、肥婆四，咁啱呢兩個月特朗普爆紅，佢畫埋特朗普，話佢惡騰騰想打尖，俾人叫佢守秩序排隊。
畫得興起，甘小文加埋薯片，老闆Jimmy唔想偏心，建議佢畫埋另外三位特首參選人，咁又畫埋上去。甘小文強調，參選人嘅排隊次序十分隨意，冇特別意思㗎。睇真啲，四位參選人嘅卡通公仔各具特色，好鬼過癮囉，唔食麵都要去影張相！