繼承父業接任鄉議局主席嘅劉業強一向係狂熱馬迷，身為「精彩小子」馬主嘅佢喺英國、澳洲等地都有養馬，唔少人都知最易搵到佢嘅地方可能係馬場，平時少開腔嘅佢惟獨講起馬仔就滔滔不絕。噚日佢更以識途老馬姿態分析特首跑馬仔，畀咗唔少貼士大家，包括買熱門未必有派彩，而無論如何，最緊要係識跑沙田，薯片超級粉絲話發仔似乎已經落咗注，因為1982年加入政府嘅曾俊華，首個崗位就係沙田助理政務專員。其實林鄭喺沙田落區時畀過500蚊乞兒，葉劉則喺沙田車公廟俾麒麟撞過，唔知佢兩個又算唔算識得跑沙田呢？
估最終得3匹入閘
發仔噚日喺鄉議局盃午宴致辭時笑指，一入場就有好多人問佢攞貼士，指3月26日有一場大家非常期待嘅賽事，戰況相當激烈，佢認為唔同馬有唔同甚至多位練馬師、騎師，建議根據往績、場地適應性落注，笑言最重要係識跑沙田，否則唔會支持，因為沙田位處新界。
佢同時話，有啲人鍾意買熱門，但可能冇派彩，有啲人則喜歡收西風、北風，而佢就一定會聽取鄉民意願作決定，強調馬嘅背景唔重要，最緊要沙地、泥地、長短途都識跑，有啲馬雖然練馬師訓練得好好，但一出閘就甩鞋、被撞，估計最終只有3匹馬可以入閘。
雖然發仔冇講明意向，但薯粉聽完開心到暈，皆因曾俊華做過沙田助理政務專員，一定識跑沙田啦，而喺造勢會甩鞋嘅係林鄭、被麒麟撞過嘅係葉劉，似乎暗示撐曾俊華咁噃，尤其佢早前仲讚過曾俊華提出嘅丁屋居屋混合模式好，兼且拒絕咗入林鄭競選辦，可以預見就算鄉議局真係綑綁提名林鄭，到暗票投票時，發仔呢票林鄭唔係袋袋平安噃！
李八方