愛妻號騎師潘頓幸福滿瀉，佢靚老婆Nicole預產期係星期三（8日）朝早，呢一胎係仔。加埋愛女Roxy，第二次做阿爸的潘頓到時就會湊成一個好字，並從此變為一家四口。
所謂人逢喜事精神爽，潘頓今午（5日）於沙田日賽第四場四班1400米，勝出姚本輝馬房大熱門「平天下」，令自己喜上加喜，潘頓可袋近5萬元頭馬獎金。至於「平天下」四個月內跑到第七次，呢場用新配搭即響今季勝鼓，單Win及組合獨贏A1分別派36.5及22元。
「平天下」係六歲英國自購馬，去年試過右前腿肌腱受傷，幸而成功康復。季內原本搏極唔識贏，呢次由潘頓接手卻有脫胎換骨式表現，沿途前置守內欄慳位跑，直路移出中叠一望空即加速拋離所有對手，從而奠定勝局，贏四分三馬位姿態相當輕鬆，而潘頓自己亦告連續第二次建功，姚本輝更已連勝三次沙田日賽未斷纜。
姚本輝說：「『平天下』今場早段被『五星特工』過頭後，我原本都好擔心『五星特工』放得不夠快，會阻住『平天下』。『平天下』在四班有利，牠以往腳筋有問題，休息了一整季，馬主給予耐性及時間等待，希望牠保持健康良好，繼續有好表現。」
第四場二至四名順序為「大籐王」、「魅力知寶」及「再石磨藍」，四重彩派二萬五千幾。當中「大籐王」搭番頭馬「平天下」見證這天首次開出大熱連贏，派彩有118.5元。