提起張茆，當然要講一手「捧」佢成名嘅倪震。
08年，當年44歲嘅倪震，同41歲周慧敏拍拖19年，感情早已昇華至老夫老妻，點知倪震俾雜誌斷正喺中環蘭桂坊，同城大女生張茆激咀，事後倪震承認自己情難自禁「孔雀開屏」，搞到幾乎同周慧敏甩拖，好彩最後二人重修舊好，仲拉埋天窗。
結婚後，倪震修心養性戒夜蒲，即使去蘭桂坊飲酒，亦只揀同性朋友。早年佢同周慧敏夫妻檔合資開桌球館，主力喺波樓打躉睇檔，閒時就留喺家中做住家男。
不過自從波樓有索女跳脫衣舞等負面消息傳出後，有指倪震已甚少返舖頭打點，得閒就行吓電腦廣場、影碟舖同咖啡店嘆吓tea，大部分時間都係同職員打牙骹消磨時間，十足退休人士生活咁。
另外，倪震亦會花時間心機放喺投資股票上，有指數年前，佢試過扑中一隻冷門股，令佢喺短短一個月內賺近千萬。