新正頭政壇中人聚埋，三句唔埋就講特首跑馬仔。觀塘區議員、青年民建聯主席顏汶羽（Frankie）趁新年請傳媒去佢屋企一聚，分享那些年同葉劉嘅小故事。
喺2007年左右，仲讀緊書嘅佢已經一心從政，當時入咗匯賢智庫，會員編號係41，自言應該係首批成員。佢笑言人生首次參與嘅政治活動就係同葉劉一齊去紀律部隊宿舍做選民登記，皆因當年對方力捧退休警察凌劍剛選區議會。點解之後轉投民記懷抱，冇留喺葉劉跑道等起機？佢話當時葉太未組新民黨嘛，而佢實習時幫過陳鑑林，所以入咗民建聯。
早前民記拍咗段《民記廚房》短片，Frankie太太Joyce都有亮相，原來佢唔係做樣，煮餸方面確係有一手，但Frankie太忙，平時好少返屋企食住家飯。