死極都可以復活嘅《富江》、詭異得嚟又充滿美感嘅《人頭氣球》、陰森殘忍嘅《雙一》，一個個出自日本恐怖漫畫大師伊藤潤二筆下嘅角色，今日正式登陸香港，連同大師手稿真迹，即日至26號喺中環PMQ元創坊地下嘅《伊藤潤二恐怖美學大展》展出。
展覽籌備歷時近3年，香港係繼台北同上海後第3個展出嘅地方。今次展覽將伊藤潤二畫嘅平面畫作，透過AR技術，喺手機鏡頭下變成栩栩如生嘅恐怖動畫，冇心理準備嘅真係隨時嚇親。
首展《魔之碎片》手稿
為咗同之前兩站有區別，嚟自台灣嘅策展人溫怡寧特別同伊藤潤二商討，將本土題材融入展覽，好似將《人頭氣球》crossover廟街夜景，又將香港特色雪糕車同其中一個短篇作品《冰淇淋車》合二為一，香港粉絲一定零舍有共鳴。展覽亦首度展出10幅2014年新作《魔之碎片》手稿，等大家近距離欣賞大師嘅細膩筆觸。展覽門票100蚊，現場亦有紀念品專門店，T恤、Tote bag、畫冊，甚至連紙膠帶都有。遊客亦可以喺photo booth免費影相，將自己個樣key落人頭氣球上面。
