本屆香港打吡大賽仲有個半月左右就舉行，好多騎師正向各大廐主爭取座騎，其中今日（5日）第八場二班1400米告東尼隻「加州議長」，如果入選打吡的話，好有機會由贏馬拍擋郭能壓陣。
「加州議長」來港後三戰得冠亞季各一成績，表現甚佳，但由於上仗只是贏泥地1200米，與打吡路程草地2000米截然不同，難免令人覺得此駒頂多是陪襯角色。
雖然告東尼接受馬會訪問時表示，對「加州議長」的體格成長十分滿意，指馬兒正在不斷進步中，絕對有力參與問鼎打吡的行列。但郭能就另有一番見解唱反調，佢話「加州議長」長力止於一哩，未必夠氣量應付2000米，但日後必定會係一匹級數極高嘅中距離馬，有力叱咤1400、1600米級際賽，所以今場跑番曾兩度上名嘅田草1400米，抽1檔及只負126磅，自然惡氣十足。