距離特首選舉提名期仲有一個禮拜左右，各路人馬入唔入閘大家心中有數，偏偏賣關子係政界尋常事，唔係超凡身價又點樣凸顯？好似立法會前主席、民建聯曾鈺成咁吖，佢噚日出席活動再被問到會唔會選特首時，繼續唔正面回應，只係話冇新嘅考慮，當提名期喺3月1日結束後，大家就一清二楚。
唔選嘅話會唔會助選？佢話暫時未有計劃，自己做緊政策研究工作，希望喺參選人爭取提名前，提出關於管治問題同維持一國兩制等政策建議畀各人考慮。至於前財爺曾俊華發起眾籌，佢會唔會捐錢？曾主席話喎，相信對方係想廣大市民多啲參與喎。
被問到喺網台節目批評林鄭目空一切，佢特別澄清，呢四粒字唔係佢講嘅，當時係主持人提出評論各參選人，佢講咗林鄭嘅優點同弱點。