這天（5日）沙田馬場盃賽之一係第五場鄉議局盃，新界鄉議局集團團體算係半個主人家，可惜此團體名下馬「新界之星」在第二場四班1000米直路賽姍姍來遲只跑第三，完全對雷神座騎蘇偉賢馬房「彪形猛漢」唔構成威脅，結果「彪形猛漢」服役初出即輕勝，單Win及組合獨贏A2分別派35及22元。
三歲澳洲自購新馬「彪形猛漢」今次俾落飛黨扑中，臨尾係綠燈3.5倍次熱，陣上14檔起步，沿欄貼住外欄領放，就此由頭帶到尾贏2.5馬位，無驚無險地打響服役頭炮，並與亞軍馬蔡明紹操刀、告東尼馬房的「萬事醒」串成一條服役初出馬Ｑ。
賽後蘇偉賢一貫地生鬼，擺晒pose又握拳、揮掌及豎拇指，表現興奮。而今場三、四名順序為「新界之星」及「蓋世之寶」，四重彩派一萬蚊多啲。
「彪形」系陣營養馬多年，掌舵人劉展灝去年6月出席標準工時立法諮詢會時被人擲假髮，翌日清晨疑因心臟病，於廣華醫院去世，終年66歲。
其一對兒子劉燊濤與劉燊霆薪火相傳，今季引入「彪形猛漢」延續先父養馬傳統，此駒亦好生性，這天一出即贏，令劉展灝在天之靈得到安慰。