同選委識於微時，係咪會有着數啲？八方唔知，因為根本冇票，唔多覺關自己事，但似乎相識還相識，唔一定令參選人有得益。
教協會長馮偉華自爆同特首跑馬仔大熱門林鄭月娥識於80年代，原來喺1984年佢同林鄭啱啱都投身社會打第一份工，林鄭係西貢政務處助理專員，馮偉華就係前線社工，當時因為政府大力推動地方行政，佢就負責組織團體向林鄭反映意見。佢大讚那些年嘅林鄭好有熱誠兼投入，交手經驗愉快，覺得林鄭肯聽意見，仲笑笑口話林鄭好肯親自「落水」，因為當時佢哋一齊呼籲艇戶登記做選民。
雖則大讚林鄭當年表現，又話林鄭噚日虛心聽選委意見，但身為教育界選委嘅馮偉華話對提名至今未有決定，睇嚟林鄭要爭教育界支持，一啲都唔易。