【本報訊】譚穎倫，粵劇界的Alan Tam。「申請乜證物證，叫親我個名都全人類望過嚟，每次都要遲3秒先敢企起身」，當年爸爸戲言「想大歌星都叫佢老竇」，今日，他真的成了新星，卻是粵劇界的明日之星。新春期間，他為西九戲曲中心在高山劇場演出，首次擔當文武生，是入選接受訓練的14名新晉演員之中最年輕一位，「成個中學階段基本上冇朋友，同學儲波鞋我分期付款儲戲服，好難傾得埋」。初中已獨個兒隨戲班到長洲演神功戲，這個非常90後謂不怕孤獨：「條路係自己揀，冇得怨。」
記者：呂麗嬋
記者一度以為，眼前的譚穎倫不是「香港仔」。香港仔大都關心買樓首期平價機票人工高低，比較知性的或會慨嘆世道中落政治崩壞，但阿倫眼中只有被一般年輕人定性為過時又老土的粵劇，非常另類。走進他那位於葵涌的演員貨倉，古早木箱層層叠，都是他珍藏的戲服和道具，儼如迷你戲服博物館。「呢塊板拆出嚟可以燙衫，化妝箱一打開，就係粉紅色有鏡嘅化妝枱，全港只剩番3個師傅識做」，如數家珍，就像港女數算珍藏名貴手袋，巨細無遺，滔滔不絕。
「爸媽都唔識粵劇，細個只有我會跟爺爺去睇大戲」。鍾情粵劇，只因3歲那年在電視看過一次《帝女花》，主動要求參加兒童粵劇班，但說到不能自拔，他謂全因爸爸的一句話：「佢成日話睇吓你堅持到幾耐。」性格包拗頸，被認定3分鐘熱度，他越要做到最好。別的孩子迷卡通片，他情迷老成持重的《香夭》，亦生亦旦，一句「倚殿陰森奇樹雙」，滾瓜爛熟；別的孩子看現代漫畫，他背古風曲譜，默書可以捧蛋，台詞卻不會忘記。
發育變聲 男旦變生角
「初中已跟人去離島演戲，做神功戲午夜12點先可以走，頭班船半夜兩點四，返到去沖埋涼，5點瞓，6點半起身，趕8點返學」。跑碼頭，像上世紀用語，卻是他中學生活的寫照，每天只睡一兩小時，持續幾個月。升高中，有老倌賣戲服，數萬元，每月6,000分期付款。「做粵劇，除非只係茄喱啡，否則好多角色都要自備戲服」。原以男旦為目標，可惜人生總是事與願違，升中時發育變聲，被迫演生角，妥協調節、努力接受，就是不想放棄。
「可能覺得唔甘心啦？」他反問，更像問自己。年輕人可以為理想馳騁，香港父母大都是現實派，全職做粵劇演員，家人不反對嗎？「爸爸以前做生意，喺我小三時破產，之後轉做保安，長期返夜更，唔得閒理我」。他與3個同父異母的兄姐，一度住進倉庫避債，家庭破碎造就獨立性格，初中已偷偷兼職，做侍應和售貨員，賺零用錢養自己。沒日沒夜工作，大部份收入都用來買道具和戲服，他在葵涌的貨倉有11個衣箱，是他全副身家，「要做好件事，就係要咁」。全力以赴，他覺得理所當然。
由汗流浹背的簡陋戲棚到外國藝術節，在新加坡藝術館、巴黎湖邊戶外演出，中學畢業即投身全職演員行列，爭取經驗，不拘一格。23歲，走了比別人更多的路，若不演粵劇，有想過會做甚麼？沉默一陣的譚穎倫這樣回答：「我都唔知，唔做戲，可能我只係一個廢青。」對物質生活無大要求，這個他自己口中的廢青，對做戲卻要求極高，「就算幾句台詞都好，想做好每一個角色」。四出尋找機會，他在facebook成立專頁，又到學校教小朋友認識粵曲，與時並進。
從神功戲演到法國台板
「去其他地方演出，心情比喺香港輕鬆，反而發揮得更好」。小時候放學後演神功戲，今日衝出香港，他始終享受帶着戲服跑碼頭的生活。上年他應旅發局邀請，於法國波爾多加隆河畔演出折子戲，以京劇《貴妃醉酒》為藍本，扮演唐明皇，唱出新編《宴舞醉楊妃》，又到加拿大登台。「外國人好多時比香港人睇得更投入」，香港人認為過時老土，在老外眼中卻是傳承文化的中國歌劇，自言再無退路的粵劇界Alan Tam說。