上年精英賽喺坐1,900人嘅修頓舉行，今年就移師坐得1,500人嘅麥花臣（圖）；唔少球員都like修頓熱鬧啲。學體會話換場係因為book唔到，而下屆就已經去信坐3,000幾人嘅新伊館，即係年年都有新場打喎。
花絮︰翁金驊教路你要聽
初五喺工商盃決賽射入絕殺三分嘅翁金驊（圖），噚日帶領漢華贏青中，殺入女子組決賽。問翁sir有冇同球員講過自己球絕殺，佢話冇特登講喎，但就話如果大家睇過《蘋果》報道，希望感受到做人要有決心同鬥志，咁就冇嘢可以難到大家啦！
花絮︰過百老幼球迷排隊拎飛
學體會噚日為八間參賽球隊各預留120張門券，而喺上、下午兩節就預留400張，免費畀公眾人士排隊攞。學體會職員朝早六點幾到場，已經有百幾人排隊（圖），除咗學生之外，連老人家都有！
