【專題籽：港情講趣】
上水新功街完全係水貨客樂園，奶粉尿片金莎藥油齊備，由早到晚篋來篋往，轆來轆去。今個月19日，啲篋要讓路了，取而代轆的，係好多張辦公室椅，一場絕無僅有，別開生面的辦公室椅速度賽，即將於新功街假日行人專用區上演。
大家喺office可能都鍾意坐住張轆轆凳周圍轆，估唔到會有人儍到將佢帶上街頭，離開沉悶的office在石屎路上飄移。儍人一號與儍人二號係新功街Cafe Je T'aime兩位老闆黃家傑及沈宏樂。佢哋漸漸覺得所在社區有點疏離。阿沈收起笑容，認真地說：「大家都見到上水石湖墟呢幾年變遷很大，多咗賣批發貨嘅舖頭、水貨客。鄰里關係相對顯得薄弱。我哋唔想純粹做生意。」佢哋喺街上開店五年，睇住店舖由服務街坊的小店，變成為人民幣服務，好唏噓。他們的cafe也因業主欲收回店舖，大概只能經營至年底。佢哋要爆了，希望餘下這一年盡量大玩特玩，令呢條街重現生氣。家傑謂：「我哋都喺上水成長，好想為呢度營造啲開心氣氛，希望街坊可以一齊來玩。」
醫生護士做義工 店舖贊助小禮物
比賽分個人及接力賽，這個睇落搞笑多於認真嘅活動，都係想區內香港人可以癲番下，令條街無咁悶。佢哋已向警方申請不反對通知書，也正招募義工在賽道維持秩序。「最得意係有醫生同護士話願意來做醫護義工。我哋有接力賽，兩人一隊交棒接棒，過程中可能有人唔小心跌倒，醫護就好緊要啦！」佢哋為咗連結社區，更找區內店舖贊助小禮物，大家都幾支持。家傑說：「有酒、鹹蛋 、紅棗，連泰拳課堂都有。」物輕情義重。
辦公室椅比賽原來日本京都及台南正興街都有辦過，他們受啟發嘗試把活動搬到香港。看網上片段，發現參與人數頗多，圍觀打氣的人擠滿街。佢哋歡迎區外人士一齊入去玩，不過要自備椅子。
日期：19/2
查詢：Cafe Je T'aime
記者：葉青霞
攝影：劉永發、徐振國
編輯：潘肇南
美術：楊永昌