「Well，be lee 當興興 call hai 速d淑腎」，咪以為八方未食藥，亂咁噏，查實係同大家拜年箒！不過係用泰文，係跟泰國通胡慧冲學嘅！
自填自演一手包辦
胡慧冲幾年前喺Central World門前拍過賀年MV，今年又嚟料，喺泰國廟宇拍咗新賀年MV，歌詞由佢一手包辦，聲稱因為舊年無論香港或泰國都有好多唔愉快事件，希望雞年大家開開心心。八方睇完啲詞，忍唔住話好old school，胡慧冲就話自小係許冠傑粉絲，所以試吓將呢類老香港情懷放入首歌。
歌詞劈頭第一句係：「昨天阿媽、姑媽兼阿嫂，問起我泰國能去嗎？合家有請新春飛去玩，食餐正嘅開開心冇問題」。當中仲有兩句泰文，字幕嘅廣東話譯音係：「Well，be lee 當興興 call hai 速d淑腎」，原來意思係：「好，今年要發財祝你行好運」。
原來呢首歌係佢喺大台J2台節目《冲遊泰國》嘅主題曲，MV中嘅佢又跳又唱，仲好落本請咗泰國人伴舞。佢笑稱𠵱家旅遊達人周街都係，要殺出重圍，一啲都唔容易。