噚日係大年初七人日，鄉議局按傳統搞新春團拜，唔單止特區政府多名高官撐場，仲吸引到3位特首參選人曾俊華、林鄭月娥同葉劉淑儀畀面出席。呢次都算係佢哋3個宣佈參選後首次同場，可惜3人零交流，暗戰味極濃！
最先到場嘅就係鬍鬚曾，佢到場後立即獲得唔少鄉紳拉住佢合照，有啲鄉紳仲打關係牌，話同鬍鬚一樣姓曾，𠱁到鬍鬚相當之咁開心，可見佢人氣相當旺。
之後輪到林鄭入場。鄉議局主席劉業強都講過傾向支持林鄭，果然林鄭到埗，成個場熱鬧起嚟！鬼咩，林鄭身邊有幾大護法傍住，例如新界社團聯會理事長兼民建聯副主席陳勇、港區人大代表兼觀塘區議會主席陳振彬，加上唔少行家一見林鄭蜂擁而上，淨係個勢，林鄭都贏鬍鬚一截。
離場各行各路
至於葉劉，好似透明人咁，只係得政圈中人同佢打個招呼、握吓手咁，莫講話鄉紳，連傳媒都冇乜意欲影佢，認真慘慘豬，輸台下氣勢嘅佢，好在有得以立法會議員身份上台影大合照，有得祝酒，算係攞番少少彩，但其間都忍唔住面燶燶！據聞鄉議局有諗住邀請兩位前司長上台，但兩人覺得唔適合而推卻。
其實八方都嘗試過拉攏鬍鬚曾同林鄭合照，之但係鬍鬚唔肯喎。點都好啦，活動一完，林鄭同鬍鬚兩個人就雞咁腳走，一個要準備造勢大會、另一個準備見傳媒。雖然兩個一齊走，卻各自用唔同門口走，呢啲名副其實係各行各路喎！
李八方
