鄉議局年年都喺初七人日搞團拜，今年嘅團拜焦點，當然係幾位參選人喺現場嘅表現，尤其林鄭月娥同曾俊華喺台下受到記者同鄉紳重重簇擁，其他賓客幾乎冇碇企，齊齊變成大佈景板。
噚日其中一位佈景板就係政制及內地事務局局長譚志源，其實佢同鄉議局好有淵源，因為佢係新界鄉議局元朗區中學嘅校友，所以對鄉議局特別有感情，幾乎年年新春團拜都出席。而佢噚日特別開心，因為可以同狀元小師妹郭曉嵐合照。佢呢位小師妹好犀利，喺文憑試考獲6科5**佳績，成功考入港大讀法律，難怪身為大師兄嘅譚志源都咁自豪，但佢都不忘自嘲，雖然係師兄妹咋，但相差成卅幾年咯！
鄉議局主席劉業強噚日代局方頒發兩萬蚊獎學金畀郭同學，祝願他日法律界多一個良才。