前車路士中場林柏特周四透過社交網站宣佈掛靴，雖然38歲嘅佢自舊年幫美職聯紐約城踢完季後賽後叫做賦閒在家，但話晒都係退休生活第一天，點都要賀一賀佢嘅！林伯周四晚就為靚靚主播老婆Christine Bleakley慶祝38歲生日，帶埋兩個囡囡Isla同Luna出去食日本菜，仲喺社交網站貼相晒幸福：「退休福利！同我嘅三位女人歡度時光，靚靚老婆生日快樂！」林伯同Christine喺2015年尾結婚，雖然兩位囡囡都係前妻Elen Rivas所出，但一家四口相處融洽，Christine亦有喺ig轉發林伯退役嘅post，仲話「今日為老公自豪」，認真sweet。
不過，睇嚟車迷就唔係好想畀林伯休息，因為其中一個最多like嘅comment就係「唔好浪費時間喇，我哋需要你喺車路士做助教呀！」，希望佢快啲好似「雙特」拍檔謝拉特咁愛‧回家執教鞭！