林鄭月娥噚日嘅分享會有成過百記者採訪，唔少記者包括《蘋果》同事都全程舉手，可惜都未獲發問機會，反而林鄭競選辦卻特別畀機會平日冇得入場採訪政府官方活動嘅熱血時報記者提問，令在場唔少傳媒好意外。
熱時記者嘅提問都相關佢哋嘅採訪權，話以往特區政府都拒絕網媒同新傳媒入場採訪，「好多謝你（林鄭）今次邀請我哋嚟採訪」，問林鄭當選特首後，會唔會承諾繼續呢個採訪安排？
林鄭回應時話，聽到提問記者嘅意見，稱一旦當選特首，將為政府帶來「管治新風格」，包括更大包容性、更開放、透明度更高：「今（噚）日你有個咁積極回應，我哋一定會認真考慮」。熱時其後都喺facebook「報道」林鄭嘅回應，但都點明林鄭冇作出具體承諾。