雖然特首選舉提名期仲未開始，但各路人馬經已鬥得難分難解。最近仲有人加入戰團，話說有選委收到名叫陳鈺麟嘅參選人喺上個月23號發出嘅求見信，究竟呢位鈺麟係何許人呢？
八方打過電話畀呢位陳生，佢未必有知名度，但就誠意搭夠，就算有感冒，把聲唔係好得，都同八方傾咗幾句。佢話今次參選係因為覺得香港人應該享有番應有嘅權益，而作為特首，應該依法處理香港事務；唔單止咁，陳生仲直言，現時4位特首參選人嘅政綱喺佢眼中都係冇完全依照法律履行特首職務，似乎好有信心咁！
求見選委遭拒
咁到底目前4位參選人，邊位係陳生嘅勁敵呢？佢冇正面回答，反問想知邊個有資格合法做特首？果真霸氣盡出！至於政綱，佢首推全民普選特首及立法會，民生上主打全民退保，總之為香港撥亂反正，所以佢唔界定自己泛民定建制，一於以香港人同中國公民身份出發。
八方聽到陳生咁雄心壯志都感到相當鼓舞，可惜收到佢封邀請信嘅選委冇乜意思見陳生，陳生話發出嘅邀請信未有任何回應。