手機鏡頭帶來方便的攝影，按下手機快門後，隨意調色、美圖、重拍，但30多歲的Albertino卻鍾情不能刪除、不能修圖的即影即有相片，薄薄相紙留住溫度、速度、溫柔和憤怒，他早前以年逾半百的舊鏡頭、結合新相機和LEGO積木，砌出可能是世界上首部LEGO雙鏡頭即影即有相機，每格菲林框住的不止是影像，而是美好的童年回憶。
為攝愛兒改良相機
從事金融業的Albertino醉心研究改良即影即有相機，原來與幼時經歷有關，「我好記得9、10歲嗰時去泰國旅行，第一次影即影即有，仲有一次喺商場過聖誕影過一張寶麗萊，當時嘅情況我記到𠵱家。」
數碼相機方便，但他指有厚度和溫度的相片才令人珍而重之，「數碼相好少會攞出嚟再睇，即影即有就睇得最多，每一張都係一個驚喜、一個挑戰。」
為記錄兩歲兒子的成長片段，他兩年前開始嘗試將舊鏡頭與新相機結合，「即影即有鏡頭唔夠光，難影小朋友。」他開始搜羅舊式雙鏡反光相機，將鏡頭拆出來砌在即影即有相機上，令相機能調校光圈和快門，至今已有約10部改良版的即影即有相機。
去年一次與LEGO的「偶遇」，令他想起這kidult玩意亦可與相機crossover，「鄰居丟咗一大盒LEGO出嚟，就諗係咪用LEGO都可以砌到相機？」製作時雖困難重重，但仍以3個星期、以450件積木，結合有近60年歷史的Yashica 635雙鏡頭和富士即影即有相機，製作出LEGO雙鏡頭即影即有，「用LEGO砌相機有唔少，但加埋雙鏡頭嘅即影即有相機應該冇乜人做過啩。」
早前他獲相機品牌LOMO青睞，邀請探討合作計劃，下一步希望用有100年歷史的舊鏡頭，與僅1歲大的富士即影即有相機結合，他指此類相機難大量生產，只想更多人懂得珍惜昔日的瑰寶。
■記者鍾雅宜