新年前在文華東方酒店買麵包，遇到才女W準時三點到達取貨（姨甥女生日蛋糕），傾起嚟，原來佢係林鄭fans，認為林鄭可替女性打破玻璃天花，成為香港第一位女行政長官。林鄭有乜優點？佢話，打得有擔當囉，肯做事囉，勤力囉，廉潔奉公囉，佢唔鍾意葉劉老氣橫秋，成日擺出個大家姐款，又唔鍾意曾俊華掛住睇法國電影，飲咖啡，成個hea佬格，不合乎治港需要。講到呢度，左丁山明白嘞，才女W本人係雙拳打出天下，從無到有嘅標準女強人，林鄭好自然成為佢嘅偶像，而且佢在英國讀大學，信咗市場失衡，大鱷造市，官商勾結嗰套，認為政府必須強勢干預，帶領香港向前發展新產業。
咁就與左丁山有意識形態之分別，可能亦是CY，Carrie與JT之分別。梁林二人都信政府干預，認為郭伯偉、夏鼎基傳統已經過晒時，必須改行政府主導之產業政策，大政府，小市場。呢方面當然亦受中國之規劃經濟（五年計劃、十年計劃、開發大西北、一帶一路等大政策）思維影響，中國行去西，香港亦要適時配合，否則會落後於形勢。
左丁山從來不以規劃經濟、指導經濟為然，經濟理論兩派之爭，學院論文多如汗牛充棟，專欄講唔到。曾俊華如果真係做財政司任內唔肯做大花筒，大開水喉配合梁振英大計，於是被罵為hea嘅話，係故意扭曲嚟講，轉化為人身攻擊啫。本欄講過，呢種hea係有理論根據嘅，亦有實證經驗，中國經濟起飛，最初源於鄧小平大膽批准農民「包產到戶」，容許農民耕種溫飽之餘還可有盈餘，到80年代逐漸容許私人經商，有民營企業出現，先至調動到全國人民之積極性與生產力，呢啲就係資本主義市場化嘅功勞，咁複雜，唔講嘞。左丁山對才女W話，林鄭有管治能力，愛國愛港，莊曾、葉劉、胡官何嘗不然，但中聯辦（有人話反林鄭即反中央咁霸道，咁就唔駛勞煩選委投票啦）係要欽點林鄭，唔要其他三個，係因乜理由呀？莊曾目前民望最高喎，點解係要指定林鄭，董、梁周圍同佢游說？現在香港一般市民一見到林鄭，就想起CY背影，以後五年香港係仍然由董建華梁振英兩人管治，不禁氣餒；故此林鄭買唔到廁紙都成為群眾取笑對象。唔識買外賣飯盒都得，有殘廢餐可食，成為特首，以後肯繼續俯首聽命西環咪得囉！咁樣點會係真正女強人人辦呀。