特首參選人葉劉淑儀前晚出席自由黨青年團聚會，席間大讚自由黨𠵱家「成熟咗」，越來越支持政府，係建制派中堅分子，同2003年嘅最大分別，就係「冇咗田北俊」喎。
田少當年反對葉劉力推嘅23條，兩人有咩前嫌清晰可見。田少睇見葉劉咁講，繼續發揮抽水反擊能力，喺fb還擊話「多謝葉劉咁賞面」，仲趁機表明選戰心迹，明言：「不過太遲啦，我心繫薯片叔叔」，佢仲對自由黨青年團呢班「小朋友」送麒麟啤畀曾遭麒麟撞飛嘅葉劉做禮物表示「滴汗」，諷刺話「過門都係客」喎。
有網民睇到田少個post，就話葉劉同2003年最大分別，「就係葡萄味重咗好多」，反建議自由黨應該送葡萄酒畀葉劉至啱喎。