雷神又一次展現高超騎技，這晚（2日）谷草第四場四班一哩，佢騎番呂健威馬房「紫電明珠」，即刻幫呢匹馬打破今季齋缽，亦幫埋呂健威補祝生日，單Win及組合獨贏A1分別派56.5及25.5元。
六歲馬「紫電明珠」之前贏過三次，包含兩次谷草1800米及一次田草1400米，統統都係由雷神經手。但今仗之前，「紫電明珠」季內未用過雷神，反而4度配蔣嘉琦俱跑亞軍而未勝，由於未能向馬主交代，呂健威今仗棄用女徒弟，重配雷神，而嘉琦此場則坐冷板。
結果「紫電明珠」果然只服雷神，今場人馬重逢跑谷草一哩，9檔平平仍迅速切入，沿途前置跑主動，末段最先突圍，臨門雖被灰馬「搵銀天皇」於外側嚴重挑戰，但雷神即係雷神，佢幫「紫電明珠」力挽狂瀾於既倒，以短馬頭位氣走「搵銀天皇」勝出。雷神連同第三場贏蔡約翰馬房「主力艦」，率先起孖領先騎師王。
呂健威去年12月27日勝出「威勢之寶」以來，相隔超過一個月，馬房這晚始再捷，而呂健威本人上月22日58歲牛一，「紫電明珠」今晚亦為佢補送一份賀禮。呂健威表示此駒陣上忠心準繩，與莫雷拉亦最合拍，今場人馬發揮可謂一絕。
第四場二至四名分別為「搵銀天皇」、「天賦致寶」及「實在威」，四重彩派8,320元。